Freedom QJ League жасөспірімдер лигасында U17A санатында өнер көрсететін «Тараз»-U17 командасы соңғы үш матчта үш жеңіске жетті. Алдымен, жас жерлестеріміз өз алаңымызда «Атырау»-U17 командасын 2:1 есебімен жеңді. Біздің ұжым сапынан Саян Ташимбетов пен Ералы Тұңғыш гол соққан еді. Айта кету керек, қақпашымыз Арсений Покаенок ойынның соңғы секундтарында пенальти қайтарып, жеңісті нәтижені сақтап қалды.
Одан кейін, Павлодарға қонаққа барған жамбылдықтар Азамат Асқарұлының дублі мен Ералы Тұңғыштың голы арқасында «Ақсуды» 3:1 есебімен ұтты. Арсений Покаенок бұл кездесуде де пенальти тосып, жеңіске жетуге орасан зор үлес қосты.
Осы сәтке дейінгі соңғы матчта Фархад Мирсалимбаев шәкірттері «Қайсар»-U17-ден 5:1 есебімен басым түсті. Біздің команда сапынан Еркебұлан Науханбай дубль авторы атанса, Ералы Тұңғыш, Нариман Асубек және Адият Дексен бір голдан еншілеріне жазды. Бір қызығы, қақпамызға үшінші матч пенальти белгіленіп, тағы да қарсыластар мүлт кетті. Бұл жолы екінші қақпашы Марғұлан Садуақас өз биігінен табылды.

Толығырақ...