Естеріңізге сала кетейік, тараздық ұжымның көшбасшысы Ерсұлтан Қалдыбеков кәсіби мансабын Атырауда жалғастыратын болды. Осы орайды, «Тараздың» экс-капитаны клубтың баспасөз қызметіне сұқбат берген еді.

-Ерсұлтан, саған Премьер-лиганың бірнеше клубынан ұсыныс түскенін білеміз, мансабыңды неге «Атырауда» жалғастырамын деп шештің?
-Жыл басында біз клубтың басшысы Жандос Ахметовпен маған лайықты ұсыныс түссе, мен қабылдасам, басқа клубта ауысуым туралы келіскенбіз. Бірінші айналымнан кейін маған «Атырау» тарапынан жақсы ұсыныс түсіп, ұзақ ойлана келе, мен қабыл алдым. Әрине, мен бұдан да мықты лигада өнер көрсеткім келеді, себебі, футболшы өзінің дамуы жайлы ойлауы қажет.

-Маусым соңында туған командаңа қайта оралуың мүмкін бе?
-Әрине, мен Тараз футбол мектебінің түлегімін ғой, бұл жерде кәсіби деңгейде доп тебуге мүмкіндік алдым. «Тараз» футбол клубымен 2024 жылдың соңына дейін келісім-шартым бар, ал, «Атырауға» маусым соңына дейін жалға ауыстым. Егер, «Тараз» келесі маусымда алдына үлкен мақсат қойып, Премьер-лигаға шығу мәселесін қарастырса, мен мансабымды туған жерімде жалғастыру мүмкіндігін қуана ойластырамын.

-Командадағы жігіттерге айтарың бар ма?
-Мен жігіттермен және бапкерлік штабпен жылы түрде қоштастық. Бірге атқарған жұмысымыз үшін, зор алғыс білдіремін! Бізде жарқын, қысымға толы матчтар болды. Чемпионаттың екінші бөлігін клуб тамаша өткізеді деп сенемін, өйткені, бапкерлер өз жұмысын біледі, ал командада талантты жігіттер жетерлік.

-Жанкүйерлерге тілегің
-Жанкүйерлерге де айтар алғысым зор. Олар жеңісті күнде де, жеңіліс тапқанда да, қасымыздан табыла білді. Өз алаңымызда ғана емес, сырт алаңда да қолдауын аямады. Басқа қалада, бөтен алаңда үлкен қолдауға ие болу деген керемет! Қолдаушыларымзға рақметім шексіз! Туған қаламызда әлі кездесетінімізге сенімдімін. Мен «Таразбен» қошпаспаймын, тек, келесі кездескенше демекпін!

«Тараз» ФК баспасөз қызметі