«Тараз» түлегі және былтырғы жылғы капитаны Елдос Ахметов спорттық мансабын аяқтағанын хабарлады.

Даңқты қорғаушы тек туған командасы – «Тараз» емес, «Астана», «Қайрат», «Ертіс», «Қайсар», «Ақсу» секілді клубтардың намысын қорғаған.
Екі дүркін ел чемпионы, бес мәрте жүлдегер атанып, бірнеше рет кубок пен Суперкубок иегері болған. Ұлттық құраманың да намысын абыроймен қорғай білді. Еурокубоктарда бірқатар кездесуде алаңға шыққан.

«Астана» сапында Чемпиондар лигасы мен Еуропа Лигасының топтық кезеңіндегі тарихи матчтарға қатысқан.

Елдостың көшбасшылық қасиетін көпшілік мақтайды, сол үшін де ол капитан қызметін атқарды. Өз мансабында 200-ден аса матчқа қатысып, 10 гол соққан. Елдос позиция таңдауда шеберлік танытып, команданың шабуылын бастай алатын, кейде диспетчерлік қызметті де мойнына алды. Қай командада ойнаса да, бапкерлік штаб пен ойыншылардың арасында сыйлы болды.

Өкінішке орай, жарақаттары үнемі сыр беріп, толықтай бабына келуге мүмкіндік бермегендіктен, мансабын аяқтау туралы шешім қабылданды.

«Тараз» футбол клубы Елдосқа тез сауығып кетуін тілей отыра, жаңа қызметте сәттілік тілейді! Түлегіміз футболдағы соңғы сөзін әлі айтпады деп сенеміз!
Барлық салада саған сәттілік тілейміз, Елдос!