«Тараздың» капитаны «Жас Қыранға» қарсы матч туралы өз ойымен бөлісті

-Бұл бірінші айналымдағы соңғы матчымыз болған соң, тыңғылықты дайындалдық, одан бөлек, турнирлік кесте тұрғысынан да бұл кездесу зор мәнге ие еді. Матч біз жоспарлағандай басталды деп ойлаймын, себебі, шабуылға жылдам шығып кете алдық. Қарсылас қақпасы маңында айып соққысын орындап, есеп аштық. Дегенмен, қарсылас екінші тайм басында есепті теңестірді, оған қарамастан, екінші голымызды да соқтық. Бірақ, екінші кезең ортасындағы қызыл қағаз ойын нәтижесіне тікелей әсер етті. Біздің қорғаушысыз қалғанымызды қарсылас ұтымды пайдаланып кетті. Әлсіреп қалған қапталымыздан шабуыл үдеп, сол маңнан үш гол өткізіп алдық.

Жеңіліс үшін қолдаушыларымыздан кешірім сұраймын. Капитан ретінде команда атынан ат терлетіп, Алматыға жеткен «Әулиеата фанс» жанкүйерлеріне ерекше алғысымды айтқым келеді!

«Тараз» ФК баспасөз қызметі