Бірінші лига біріншілігінің кезекті турында «Тараз» Алматыда жергілікті «Жас Қыранға» жол берді.

Тараздықтар өкінішті жеңіліске ұшырады, себебі, ойын барысында екі мәрте есепте алға шықты. Алдымен, команда капитаны Ерсұлтан Қалдыбеков айып соққысын сәтті орындап, есеп ашқан еді. Дегенмен, екінші кезең басталған тұста таразы басы теңесті.

Жерлестеріміздің толассыз шабуылы тағы бір мәрте нәтиже беріп, Арсен Әшірбектің пасын қорғаушы өз қақпасына соғып алды.

Жеңіс жақын секілді көрінген еді, дегенмен, төреші, қос команда ойыншысына да қызыл қағаз көрсетіп, «Тараз» сапында Жандос Өмірзақов алаңнан қуылды. Қос ұжым тең құраммен өнер көрсетуін жалғастырғанымен, алматылықтар әлсіреп қалған қапталдан үш гол соға білді. Қорытынды есеп – 4:2